चैत १४ गते
वीरेन्द्रनगर नगरपालिका–२ स्थित सिम्लेमा रहेको सयपत्री एकेडेमीले परम्परागत पाठ्यक्रमसँगै व्यावहारिक शिक्षालाई जोड दिँदै विद्यार्थीलाई जीवनोपयोगी सीप सिकाउँदै आएको छ । विद्यालयले हरेक शुक्रबार अतिरिक्त क्रियाकलाप मार्फत विद्यार्थीलाई व्यवहारिक ज्ञान प्रदान गर्ने अभियान सञ्चालन गरिरहेको छ ।
विद्यालयमा विद्यार्थीहरूलाई दैनिक जीवनसँग प्रत्यक्ष सम्बन्धित विभिन्न सीपहरू सिकाइन्छ। जसअन्तर्गत लुगा धुने, लुगा सिउने, सरसफाइ गर्ने, लुगा पट्याउने तथा जुत्ता–चप्पल मिलाएर राख्ने जस्ता आधारभूत व्यवहारिक ज्ञान दिइन्छ। यसले बालबालिकामा आत्मनिर्भरता र अनुशासनको विकास गराउने विद्यालयको विश्वास छ।
कृषि शिक्षालाई पनि विद्यालयले विशेष प्राथमिकता दिएको छ। विद्यार्थीहरूलाई बारी तयार गर्ने, धान रोप्ने, गोड्ने, काट्ने र मिलमा लगेर कुटाउनेसम्मको सम्पूर्ण प्रक्रिया सिकाइन्छ। यसरी उत्पादन गरिएको चामलबाट विद्यार्थीलाई भात खुवाउने अभ्यासले सिकाइलाई अझ व्यवहारिक बनाएको छ। साथै तरकारी तथा फलफूल खेतीबारे पनि विद्यार्थीलाई प्रत्यक्ष अनुभव गराइँदै आएको छ ।
त्यसैगरी, हाँस पालन र मौरी पालनसम्बन्धी तालिमसमेत विद्यार्थीलाई दिइँदै आएको छ, जसले उनीहरूलाई कृषि तथा पशुपालनतर्फ आकर्षित गरेको छ । बिद्यालयका सञ्चालक रामप्रसाद वरालले विद्यालयले प्रत्येक महिनाको अन्तिम दिन कृषि तथा व्यापारिक मेला आयोजना गर्ने गरेको बताउनुभयो । उक्त मेलामा विद्यार्थीहरूले घरमै उत्पादन गरेका सामग्री ल्याएर बिक्री गर्ने गर्छन्। यसबाट उनीहरूमा उद्यमशीलता र व्यापारिक सीपको विकास भइरहेको सञचालक वरालको भनाई छ ।
सिजन अनुसारका काममा बिद्यार्थीलाई सहभागी गराउने एकेडेमीको कार्यायोजना छ । विद्यार्थीहरू खेतबारीमा घाँस सफा गर्दै, खेतीसम्बन्धी काम सिक्दै गरेका हुन्छन । यस्तो अभ्यासले शिक्षा केवल कक्षाकोठामा सीमित नभई जीवनसँग जोडिनुपर्ने सन्देश दिएको छ । सञ्चालक वरालले आफ्नो लामो अनुभवले पढाईसंगै जिवन उपयोगी शिक्षासंग पनि जोड दिने गरेको सुनाउनुभयो ।
व्यावहारिक शिक्षालाई प्राथमिकतामा राख्दै अगाडि बढेको यस विद्यालयको प्रयासलाई स्थानीयस्तरमा सकारात्मक रूपमा हेरिएको छ । “जय शिक्षा, जय कर्णाली, जय सुर्खेत” भन्ने नारासहित अघि बढिरहेको यो पहल अन्य विद्यालयका लागि समेत प्रेरणादायी बन्न सक्ने देखिन्छ ।